Sunnudaginn 21.febrúar sl. var haldin leitarhestaráðstefna í Pétursborg á vegum Leitarhesta Borgarfjarðar (LB) um notkun hesta við leit og björgun. Að undirbúningi ráðstefnunnar komu einnig félagar úr Bjsv. Kili og Bjf. Árborgar. Var þetta opin ráðstefna þar sem farið var yfir mörg mál sem varða notkun hesta við leit og björgun. Alls mættu 16 manns sem komu úr Björgunarsveitunum Brák, Oki, Heiðari, Kili og Sigurgeir, Björgunarfélagi Árborgar og BHSÍ.
Farið var yfir helstu niðurstöður undirbúningshóps frá síðasta “allsherjarfundi” áhugasamra um málefnið. Anna Pedersen Ragnarsdóttir og Heiða Guðmundsdóttir tóku fyrir hæfniskröfur knapa sem björgunarmanns og hæfniskröfur hests, Eiríkur Theódórsson talaði um útbúnað, Halla Kjartansdóttir fjallaði um tryggingamál, Soffía Sigurðardóttir fjallaði um leitartækni og hugmyndir að æfingum. Sigurður Oddur Ragnarsson hestaferðafrömuður og járningameistari tók fyrir hestaferðalög, þjálfun f. ferðalög, útbúnað og járningar á ferðalögum, Edda Þórarinsdóttir dýralæknir fór yfir hrossasjúkdóma, slys og sjúkrabúnað fyrir hesta í ferðum. Svo fór Halla yfir erlenda staðla, hugmyndir um mótun verkefnis félaga leitarhesta um slysavarnir hestamanna og um væntanlegan fyrirlesara, T’mi Finkle, frá Ameríkunni í október. Fundarstjóri var Ragnar Frank Kristjánsson og kom hann ferskur inn eftir að hafa æft sig á Fræðaþinginu:-). Að lokum borðaði hópurinn saman eðalkvöldmat frá Gæðakokkum en Magnús yfirkokkur er einmitt félagi í Bjsv.Brák og LB. Punkta frá flestum fyrirlestrum, myndir af ráðstefnunni og margt fleira áhugavert má finna inni á síðu leitarhesta: http://leitarhestar.123.is .
Dagskráin framundan hjá Leitarhestum Borgarfjarðar:
23. mars – Fundur
3. eða 4. apríl - Hittast í reiðhöll og fara í þrautabraut. Páskakeppni.
20. apríl – Fyrirlestur um það hvernig á að gera hest “sprengjuheldan”. Julio?
18. maí - Fundur
29. eða 30. maí – Stór leitaræfing með gangandi fólki og hestum
15. júní – Fundur
9. – 11. júlí – Útileguhestaferð
Til baka